最近有招聘網站搞咗個「絕世筍工：見習CEO」活動，成功獲選嘅參加者，可以跟包括CEO國際（759）阿信屋主席林偉駿在內嘅猛人共事3日。林偉駿事先表明，份工非常辛苦，「無得瞓㗎喎」！
林偉駿話，自己晚晚都做到夜晚11、12點，如果跟佢做CEO，應該會好辛苦。但佢轉頭又話，參加者只係跟佢3日，頂多只會叫佢畀吓意見，相信會頂得順。成功向林偉駿拜師嘅90後學生莊恩傑即刻賣口乖，話最好有張床喺公司，咁佢就可以一起身就返工，一放工就瞓。
除咗林偉駿，香港寬頻（1310）行政總裁楊主光，同埋超凡網絡（8121）創辦人伍致豐，都會獻出3日畀參加者做「跟得CEO」。