這天沙田晨課的焦點，當時是第一組1000米草閘，14匹出試馬中，包括9匹過百分的頂班馬，其中應屆馬王黑衣巨人「步步友」由田泰安出試，而非慣性好拍檔莫雷拉，因此更受注目。
「步步友」上個月停過課幾日，呢日係佢季內首度試閘，起步唔算快，不過冇耐都叫做跟上馬群，全程守中後位置，在田泰安胯下按住大步跟跑完成得第8，冇乜鋒芒但亦唔算差。
當試完閘後，大摩在機坪接馬，輕摸「步步友」馬頭，盡顯愛惜之情。大摩指出「步步友」將於本月25日1200米二級賽精英碗復出，由於雷神已答應繼國慶盃後，喺精英碗再騎東廐馬「幸福指數」，因此「步步友」屆時會易配田泰安。
雖然「步步友」試閘只得第8，但大摩表示對佢嘅走勢感滿意，目前健康和狀態均已復上正軌，部署與上季相若，目標是蟬聯香港一哩錦標。大摩強調「步步友」仍是上季的「步步友」，不減王者風範，有信心令佢牠重振雄風喎！
講番呢組試閘，洪金寶愛駒「崇山寶」發揮一貫高速，在楊明綸胯下一放到底奪勝，「喜寶駒」用蘇狄雄全程第二過終點。上仗易配潘頓出賽的「誰可拼」，今日喺呢組閘用番韋達跑第三，殿軍就係「天久」，而這組原配雷神試閘的「瀟洒兄弟」，因雷神遲到換上黎海榮主試。