早幾個月高調喺網上為大埔馬窩村定慧寺籌錢修復寺廟嘅著名功夫片導演劉家良遺孀、律師翁靜晶，噚日下晝3點舉行記招，高調踢爆定慧寺住持釋智定先後同兩名內地和尚結婚，又指喺釋智定掌管下，寺院賬目混亂及生活奢華等，仲懷疑事件涉及龐大和尚集團。
翁靜晶一講講足約兩粒鐘，記招喺5點左右先結束，點知喺呢個時候，有出席記招嘅定慧寺義工喺舉行記招嘅金鐘海富中心地下，發現為數6、7名和尚喺度聚集喎，有義工聲稱認得呢班和尚中，有人曾經喺定慧寺舉行嘅法事念過經，義工立刻通知準備離開會場嘅翁靜晶。適值敏感時候，翁靜晶為安全起見，決定由其他大廈通道離開，避見有關和尚。當翁靜晶離開後，義工發現呢班和尚亦散去，世事點解會咁巧妙㗎呢？