已停賽兩期之馬壇小鮮肉史卓豐，將於周三(14日)快活谷賽事刑滿復出，史卓豐在停賽前，連贏兩個賽日，10月4日賽事更憑「友歡笑」及「健康真知」起孖兼捧盃，今期復出之戰，他當然希望延續停賽前之手風，繼續贏馬。
史卓豐座騎中，機會最高應是第二場五班一哩之「公証揚聖」，上仗初配史卓豐即重開勝門，今次等番贏馬路程再出，睇部署幕後想打鐵趁熱，事實上今季呂廐兩匹贏完再出之「有智者」及「軍歌」，均順利連捷，證明馬房喜歡乘勝追擊。
另外，第七場三班1200米霍利時馬房之「越感」，亦有留意必要，此駒兩戰谷草均輸得接近，上仗更首度躋身三甲，今仗由於韋達停賽，史卓豐冷手執個熱煎堆，接手這匹實力馬，必把握機會求勝。