周一《樂香園》見報後，有投行朋友致電密西比，指其實也不是完全沒有方法、減少創業板「癲狂炒買」行為。
朋友說：「其實好簡單，就是取消創業板，以後所有上市公司都要符合主板嘅上市規定，即時可減少咗啲混水摸魚、一心只係想用創業板啤殼嘅人。」
因噎廢食？朋友謂︰「我唔係隨口噏㗎，1999年科網狂潮，香港為咗趕上呢班科網列車，所以咪成立咗創業板囉，當年個目的好高尚㗎，係畀機會啲有潛力、有資金需要但唔夠資格主板上市嘅公司集資……由於上市條件寬鬆過主板好多，所以無提過會搞轉板機制，免得市場反對。」
越說越「火」。朋友續說：「結果係點？𠵱家咪變咗係一堆雞雞肋肋嘅公司隨便就上到市，15年嚟，邊有高科技公司喺創業板上市？2000年3月推出創業板指數，當時1000點起步，噚日收488點呀！個板有幾好質素，大家心中有數。」
創業板上市委員會前主席羅嘉瑞2000年曾說過，創業板上市委員會不會決定哪家公司適合上市，只要其符合《上市規則》，便可在創業板掛牌，「公司已將所有風險因素寫出來，如果有儍仔去買，咁就由佢買」。原來大家也是儍仔。
密西比