瑞典前鋒伊巴謙莫域（上圖），雖然喺周一嘅歐國外G組賽迎戰摩爾多瓦時，為瑞典先開紀錄，協助球隊以2:0勝出，不過，由於同組嘅俄羅斯，喺同日亦以2:0贏咗黑山，所以瑞典最後都係以兩分之微不及俄羅斯（下圖紅衫），得小組第三，要踢附加賽；而俄羅斯就同埋榜首嘅奧地利，雙雙出線決賽周。話時話，瑞典連續兩場[-2]嘅賽事都開「和局」，佢哋嘅盤路真係幾難捉摸。
更加估佢唔到嘅係，原來瑞典嘅伊巴竟然攞咗金唱片！係堅㗎，話說伊巴喺上年一個廣告入面，以獨白嘅形式表演瑞典國歌，點知佢呢個version好受歡迎，累計已經播放咗300萬次，所以佢咁就拎咗金唱片囉！