【科技籽：玩物達人】
速度，總會讓人血脈沸騰，幾個大細路早前發現外國人竟把航拍機發展成刺激玩意，恣意半空追逐、極速飄移，頓時大呼過癮。而且機前鏡頭更可化成玩家雙眼，只要戴上眼罩，彷彿坐進高速戰機，隨意享受飛行快感，於是，一場場樹林「穿越」競賽正式展開。
近年航拍大行其道，「我哋之前都有玩航拍，起初感覺幾新奇，但係唔太刺激，好快就悶。」年多前，吳卓凡（阿凡）與朋友在網上首次看到外國人玩FPV（First-Person View） quadcopter，《星球大戰》般的飛行器追逐戰，短短數分鐘已令他們毒癮深種。「外國同大陸都有唔少人玩，喺大陸，FPV仲叫『穿越』，好有型！」
時速可達160km/h 零輔助靠人手
因為穿越機的速度及靈活性都遠較航拍機高，據說時速可高達160km/h（普通航拍機約20-60km/h），「掟彎」或穿過障礙物時很難掌握機身，所以它跟航拍最大分別是，玩家改以第一身的視角操控，讓反應更迅速。「以前有玩電單車，但人越大越覺得危險。穿越嘅速度更快，戴住眼罩就好似坐上戰機咁，好過癮，最重要係撞車會死人，撞機最多砌過部，刺激又安全。」阿凡如是說。
一般來說，穿越機不設GPS和氣壓計等輔助儀器，換句話說全靠人手技術，「GPS同氣壓計可以幫手穩定機身，好多航拍機齋靠電腦都能夠喺空中懸浮，但穿越機為咗追求更快更靈活嘅反應，完全放棄咗呢啲輔助儀器，所以非常考技術。」阿凡的「機友」方健豪（阿豪）和鄭舟（阿舟）一同解釋道。
相約三位大細路到將軍澳「起機」，發現他們的裝備比想像中少，只是背包加一個小型手提箱，「其實穿越機嘅構造唔算複雜，又細部，最大件嘅反而係凳。」他們笑說。三人戴上眼罩，精采的追逐戰隨即展開，只見機身在樹林間高速穿梭，單是在旁觀看已覺緊張刺激。記者暗忖操控像如打機一樣，其實唔難，豈料上手一試，以第一身的視角飛行，速度比觀戰時快上幾倍，真的像駕駛戰機般爽快，也比打機好玩得多，不過難度同樣頗高，不消數十秒已落得撞機收場，但絕對一試難忘！
七大部件任改裝 電腦調控考功夫
「改裝穿越機嘅自由度相當高，基本上成部機都可以一手一腳砌出來嚟，所以砌完起飛嗰一刻，成功感好大。」零件看似不少，其實大多只是百多元一件，七大部件加起來只需二、三千，「最貴嘅其實係眼罩，最平都要二千幾，初學者可以用小型屏幕代替，一嚟易玩啲，二嚟平得多。」阿豪接着說：「真正考起初學者嘅係電腦調控，因為空中飛行牽涉嘅數據同計算都好多，如果調錯咗，部機砌到幾勁都飛唔起。」他把機身接上電腦，即時顯示出模擬機身，多快多慢、飛行角度等均需逐項設置，感覺相當高科技。
機身
大多分為碳纖維、玻璃纖維及塑膠。因為穿越機經常發生碰撞，選購機身時要留意板材厚度，亦適宜選擇一體成形的底板，會較薄及有接駁位的耐用。機身種類則以左右對角摩打的長度來區分，一般由180mm至250mm，最新的小至150mm。
鏡頭
主要配合發射器來提供影像，一般像素不高，確保沒有時滯，要知道極速飛行時，反應稍慢足以讓你撞機，價錢約$250至$500。
摩打
（左起）主流有1806、1306及2204，以大小和力量來區分，簡單來說就是細機配細摩打，大機配大摩打，但阿凡強調摩打絕不是越大越快越好，需要整體配合，價錢約$100至$160。
飛行控制電腦
簡稱飛控，可說是穿越機的心臟，實質是微型飛行電腦，負責計算及操控，保持飛行的穩定性，需要接駁電腦來調校。現以Naze32（左，$200）及CC3D（右，$180）為主流，前者採用開放式程式，有更高自由度，但較為複雜；CC3D及Mini CC3D（中，$190）則屬入門，設定相對簡單。
電池
穿越機多用細電，因為大電太重耗電亦多。另外還得兼顧功率，功率越大爆炸力越強，以應付高速攀升及空翻等動作。他們說，一塊電池最多只可玩5分鐘左右，所以每次都會帶上十幾塊電池。
電子變速器
簡稱電變，負責控制供電量，每個摩打均需配備一個。主要留意「A數」（電流量），越高代表供電量越大，反應更快，急停及加速更得心應手。
機槳
主要有4、5及6吋，雖要配合機臂距離，150mm或180mm的只能用4吋，180mm以上的則可用5至6吋機槳。另外，大槳浮力較大較易操控，細槳則較靈活。一套四隻，約$20至$30。
最大障礙 場地難求
在香港玩「穿越」，最難是找場地，阿凡說：「香港有好多公共地方，但可以玩穿越嘅就少之又少，一嚟高速飛行始終有一定嘅危險，二嚟場地至少要有七人足球場咁大先過癮同安全。」還有頻道，現時穿越機用的頻道一般只容許5機同時使用，否則便會jam線，場地少導致玩家太集中，結果陷入死胡同。他們亦表示香港玩家應依循民航處的〈操作無人駕駛飛機（無人機）系統〉指引，限制飛行高度及範圍，以及選擇遠離人群的空曠地方放飛，免生意外。
facebook專頁：RC15E Toys Shop
記者：韓繼聰
攝影：伍慶泉、鄧鴻欣
編輯：陳國棟
美術：孔文彬