《星球大戰》（Star Wars）電影第七集仲有大約兩個月就上映，效力過保頓嘅英格蘭前鋒奇雲戴維斯睇嚟都係星戰迷，日前喺社交網站上載咗一堆舊星戰玩具嘅相，話要賣晒佢喎；但有玩家估計呢堆玩具只係值3,800鎊（約4.5萬港元）。睇嚟呢位退咗休嘅前英超球員，都要留定錢去買排山倒海推出嘅星戰產品。
冇包裝兼甩皮甩骨
38歲嘅奇雲戴維斯踢過修咸頓、布力般流浪同埋保頓三支英超隊，仲喺2010年唯一一次代表國家隊上陣。佢2013年去咗英甲普雷斯頓效力，上季幫手升上英冠後就掛靴，之前周薪估計都有幾萬鎊。《星戰》電影同戴維斯一樣都係1977年面世，睇嚟喺後者嘅成長歷程佔咗一定位置；佢喺禮拜日上載咗一堆舊款星戰玩具相上twitter，有星戰三吋半人偶同唔少戰機，連喺年尾第七集會再登場嘅名機「千歲鷹」都有三架，佢留言話「呢堆嘢喺被賣走之前，最後一次出動。」唔少網友都有留言問價，但戴維斯都冇認真答，睇嚟佢旨在曬吓收藏。
古仔擁原版黑武士
有識貨嘅收藏家為戴維斯呢堆玩具估吓價，由於冇包裝嘅玩具價值已經大打折扣，加上唔少都係唔齊配件，有啲仲要甩皮甩骨，好似有幾架X-Wing都冇咗隻翼，所以都唔算太值錢；當人仔每隻值15鎊，載具最多每架50鎊，加加埋埋成套都係值3,800鎊。呢堆收藏對唔少玩家嚟講可能只係濕濕碎，好似香港星戰迷古天樂先生嗰個玩具倉，裏面有唔少星戰收藏，包括一比一黑武士原版，仲有C-3PO和R2-D2，單係呢三個粗略估計至少值廿幾萬港紙。
雖然冇統計過仲有邊個英超球星係星戰迷，不過我求大俠估計有唔少。阿士東維拉嘅米卡李察士上載過張相，見佢隊友尼索比亞黑布蒙頭成個黑帝（Darth Sidious）咁，李察士仲叫佢咪投身「dark side」㖭。
