至今未看香港電視的電視劇《來生不做香港人》，確是有點遺憾，不只因為此劇口碑極好，更因為這個劇名，先聲奪人，七個字就說到這一代香港人心坎裏。
從來香港人都是驕傲的。曾幾何時，在鄰近地區跟前，我們永遠顧盼自豪，以為自己在體制、法治、金融、經濟、廉潔、文明、國際化等等，都勝人一籌，那裏想過十多年下來，走到這一步，不論你抱任何政治立場，都難禁黯然神傷，估唔到自我形象可以一落千丈至此。
時間推前一點，情況還不那麼惡劣時，人家開口埋口只有「來生不做中國人」，那是香港人鍾祖康在2007年出版的評論集，在內地成為禁書，據說書名源起於網易一個意見調查，問：「如果有來生，你願意再做中國人嗎？」結果係點？哈哈哈……你話呢？
是的，做嗰行怨嗰行，做公關的，開口埋口就是「來生不要做PR」，事實上，這麼一個facebook page最近已經建立，高層行家們得閒不妨入去逛逛，聽吓前線公關的心聲，你未必一定認同有關內容，但看了，做人大概就不會那麼「堅離地」。
最近被熱烈討論的，除了港鐵被指在大圍樂韻悠揚示威日一邊撲火、一邊放火；香港警察面書又要in、又嫌網民癲之刪post行為外，仲有就係政府新聞處twitter竟誤tweet律政司決定起訴「前」特首「C Y Leung」！
真係「噢賣葛」，完全係超級低級錯誤，低級到Mary認為不可置信──真係賴落自動更正function？莫非家下出稿前唔使校對審批？還是前線嗰位想告埋現任特首好耐，對了十次都覺得好啱睇，冇嘢錯？
彭瑪莉
mailto:[email protected]