歷時兩個月嘅《蘋果動新聞》真人騷《我要做導演》篩剩兩隊爭冠軍，參賽隊伍將劇本拍成微電影，隧道隊邀得譚小環、何浩文（Dominic）同范振鋒幫拖演出《隧道》；怪人隊則搵到王宗堯、張建聲、梁健平同黃美棋協助拍成《裸跑網絡人》，最後經黃修平、麥曦茵同《蘋果日報》執行總編輯張志偉投票，結果由隧道隊獨得三票獲全勝！
譚小環、范振鋒、張建聲、梁健平同黃美棋日前喺尖沙嘴出席兩部微電影首映禮，同時宣佈賽果，隧道隊特別感謝小環助陣，小環搞笑話：「以前喺電視台班底，個個年紀有番咁上下，今次我有機會台前幕後都係拍『小鮮肉』。」小環同范振鋒異口同聲支持演藝界有後浪衝入。
張建聲想再拍怪人
梁健平喺怪人隊嘅《裸》片客串賊仔，但都好專業笠絲襪，喺頒獎禮佢話：「我有啲偷雞㗎，呢部片成功我咪揭絲襪。」張建聲同怪人隊團隊許下承諾：「下次有機會玩，再搵我！」王宗堯同Dominic因工作未能撐場，就預先拍片鼓勵。
撰文：馮仁昭
拍攝器材由Sony提供
《Sony α7系列呈獻：我要做導演》播映完畢，想看兩套足本版微電影，請看另外兩則動新聞！
重溫所有集數，請到：
http://bit.ly/1OvEqwY