立法會選舉明年先開鑼，19歲嘅學民召集人黃之鋒都有興趣，噚日仲同傳媒事先張揚喺法院門口等，宣佈入稟申請司法覆核降低參選年齡門檻同埋有意參選嘅消息。
不過佢一出場就唔覺意搞咗個gag，在場記者惟有偷笑。話說之鋒搭的士一到埗，佢一支箭飆落車走入記者堆，身後就有把聲喝住佢：「喂！未畀錢呀！」原來佢心急到未畀錢落車，惟有嗱嗱聲返轉頭畀番80蚊車錢，俾人話搭霸王車就唔好啦！
查實佢考慮參選立法會嘅即時新聞一出，網民負評唔少，但噚日法庭外就有一位平民打扮嘅阿姐，喺之鋒開腔前不斷叫之鋒之鋒，又舉起手機要佢望鏡頭影相，猛話支持佢，「你阿媽有你呢個仔就好啦！香港人以你為榮！」之鋒都開心到笑咗出嚟。