基金經理黃國英（Alex）上周六再搞一年兩次嘅粉絲自費飯局，由於大市過去幾個月，氣氛急變，今次聚會人數較4月縮水四成，只得3枱、約40人（每人700元），但大家依然講到興高采烈，仲計劃明年7月舉行自費豪華郵輪遊，齊齊出公海炒股咁話。
Alex解釋，計劃郵輪遊，皆因旗下基金過去一年揸咗唔少郵輪股，而且回報理想，好似美國上市嘅皇家嘉勒比海郵輪（RCL）、挪威郵輪（NCLH）、英美掛牌嘅嘉年華郵輪（CCL），其中以RCL贏得最多，所以會成為佢哋郵輪遊目標，到時應該要先飛去歐洲，再上船，夠晒豪！Alex打算今年11月舉行基金周年晚宴時，請埋旅行社代表嚟講解個trip，希望多啲人早啲報名，價錢可能會便宜嘞。