《星島日報》嘅齊秀峰專欄，噚日刊登題為「建制擁躉噓爆自由黨」嘅文，批評自由黨喺立法會內會副主席選舉投票畀泛民係「籠裏雞作反」，引述「政壇高人」轟自由黨有違政治道德云云。
自由黨榮譽主席田北俊睇唔過眼，喺fb貼文兼留言稱：「金鍾（鐘）仁，唔好以為改咗個名就無人認得係你！如果你哋政府今年俾泛民玩殘，千祈唔好呻。」矛頭直指被傳筆名為「金鐘仁」嘅特首辦新聞統籌專員（IC）馮煒光。八方問過馮煒光對田少嘅指控有乜回應？佢回覆：「多謝他常常記得我，我經常躺着也中槍。」
篇文到底係咪出自馮煒光手筆？八方都唔知喎，只知聽日立法會改選工務同人事編制委員會正副主席，建制派極有可能包攬，前者推盧偉國拍易志明拍住上，後者建議葉劉淑儀同黃國健揸莊。