自長和集團發表公開聲明，澄清所謂（其實無中生有）的大陸撤資事件及回應內地一些在微信發表的批李言論後，引起不少本地討論，譬如對歷史熟悉的添馬男便曾在蘋果評論版提起文革前夕，上海文匯報發表署名姚文元的「海瑞罷官」。羅天昊是不是姚文元翻生，依家唔敢講，將來至知，以共產黨作風，利用投靠文人做打手嘅習慣，相信至今未除。如真有姚文元翻生之事，實在太恐怖了。左丁山誠心希望嗰段臭史已經在中國徹底埋葬，21世紀唔想再見到殭屍復活。
呢幾日在報紙見到潮州社團刊登廣告力撐潮州鄉親李嘉誠，第一個感覺就係：「好嘢噃，香港仲係有人敢講真心說話」，第二個感覺就係：「唔似香港醒目仔作風噃」，於是趁某日中午碰到一位潮州商家B嘅機會，向佢請教：「香港潮屬社團總會刊登一篇港商支持國家發展的心不會變改嘅廣告，適逢中央政治局委員、統戰部長孫春蘭到港，是否有意與內地評論對着幹？」潮商B話：「時間係咁啱啫！香港有好多潮州社團，所以又有一個潮屬社團總會，目前領導係陳幼南同林建岳，呢篇廣告係由專人起草，再經開會通過嘅，代表咗總會嘅意思。」哦，延伸推斷，潮屬社團總會可以代表所有香港潮州社團嘅意見，甚至居港潮州人嘅意見，孫春蘭與香港華商高層（包括李澤鉅）吃早餐之餘，應該有中聯辦人士向佢匯報啩，例如廣告呢一段：「過去一段時間，內地個別人士以激烈的言辭、失實的描述，說李嘉誠先生『撤資』，文章對李嘉誠先生的聲譽造成極大損害。國家現在實行社會主義市場經濟，市場有買有賣，商人依法行事，按照國家的規定經商，就不應受到誇張失實的誣衊。」
隔咗一日，又有一篇香港潮州商會嘅廣告，由會長及副會長署名，標題係「我們對李嘉誠先生充滿信心」，內有云：「李先生在祖國改革開放之初就義不容辭投資內地，在外界對祖國開放發展諸多顧慮之際，李先生之領頭羊作用功不可沒。李先生愛國愛港愛鄉的例子，不勝枚舉。我們在香港很多場合接觸到李先生，深深為他的赤子之心所感動。」
潮州人在香港商界勢力龐大，學術界亦有國寶饒宗頤，世界級經濟學家劉遵義，政界有陳智思，現在潮州人團結起來，公開力挺李嘉誠，別有意義。