證監會主席唐家成噚日應邀出席一年一度「國際財務報告準則大會」，仲擔任主講嘉賓，呢個安排真係好合適，事關佢2011年退休前，喺畢馬威做咗37年。
佢噚日話當年，提到自己43年前，即係1972年，上第一堂會計課時，老師教落嘅兩條會計「金科玉律」（T-Account左資產右負債、審慎原則），佢到𠵱家都仲記得。
不過，話口未完，佢就自爆，事先將呢份講辭交畀證監會企業融資部高級總監紀禮富（Charles Grieve）過目，諗住費事得失業界。
點知唐家成俾對方笑番轉頭，話佢古老石山，兜口兜面話佢：「仲講盈利兌現先入賬？人哋以為你係恐龍咋！」「但好消息係，審慎會計原則𠵱家興番喎！」唐家成隨即笑住回應對方「咁我都唔算好恐龍啫。」