好多香港人都應該幫襯過UNIQLO，公司眨吓眼已經進軍香港10年。UNIQLO母公司迅銷（6288、Fast Retailing）噚日宣佈，推出獎學金計劃畀本港大學生，參加者可以直接飛到日本、跟公司老闆兼日本首富柳井正對話兼潮聖。
迅銷全球高級執行副總裁潘寧指，公司在港10年開咗24間分店，希望做啲嘢回饋社會，特別係針對年輕人，所以推出呢個叫「感謝香港 共築未來」嘅獎學金計劃，由明年春季起計，為期5年。
呢個計劃，每年將會選出10名Year 3或Year 4嘅大學生，每人獲贊助2萬元學費，即涉資合共100萬元，選拔詳情11月會公佈；雖然贊助金額唔算多，但獲選同學有機會直接到東京，跟柳井正對話，機會真係好難得。