德國教練高路普接收咗羅渣士嘅紅軍帥位之餘，勢估唔到連間屋都接收埋！英國《每日郵報》狗仔隊偷拍到高路普周日帶埋老婆同囝囝去睇樓，結果續租羅渣士之前租落、位於塞夫頓公園附近嘅豪宅。呢個單位價值120萬鎊（約1,400萬港元），高路普就每個月自掏腰包4,000鎊（約4.8萬港元）租咗佢。高路普都幾講究家庭生活，除咗老婆、囝囝同囝囝女友，連寵物牧羊狗都帶埋去利物浦市，一齊進駐呢間新屋。不過，中國人都幾信風水，羅渣士住喺呢間屋俾人炒，唔知算唔算凶宅，高路普竟然唔怕死入住，希望佢唔好步羅渣士後塵就好嘞。
飲咖啡又被野生捕獲
雖然有消息話高路普喺禮拜日已經首次帶隊操練，但原來係流料，佢要禮拜二先正式帶操，所以日前就好得閒喺利物浦市周圍行，俾機會利迷捕獲佢。繼上周五蒲吧同人合照後，佢周日去飲杯咖啡都一樣有兩位球迷邀請合照，仲放埋上網㖭（下圖）。