「呢場係我一生中最開心嘅輸波！」邊個可以講出呢啲大口氣嘅說話？之唔係威爾斯球星加里夫巴利囉！皆因威爾斯雖然喺上周六嘅歐國外B組作客以0:2不敵波斯尼亞，但同組嘅以色列竟然爆冷喺主場輸咗畀塞浦路斯，造就咗威爾斯輸波都可以晉身2016歐國盃決賽周，57年來首次殺入大賽嘅決賽周。
吞波斯尼亞兩蛋照晉級
喺上周六賽前，威爾斯喺B組居首，作客波斯尼亞只要攞到一分，就可以自1958年以嚟首次晉身大賽決賽周。點知威爾斯接戰後表現唔出水準，最後以0:2不敵波斯尼亞；不過，好彩威爾斯命不該絕，同組原本排第三嘅以色列，竟然喺主場以1:2輸咗畀塞浦路斯，所以，唔使計最後一輪分組賽，威爾斯同比利時都夠分雙雙攜手出線，波斯尼亞排第三要踢附加賽，而以色列就跌咗落第四位。
巴利未來外父涉詐騙被捕
苦等咗57年，威爾斯終可以殺入大賽決賽周，賽後班職球員都興奮不已，佢哋仲齊齊將領隊高文拋起，而效力皇馬嘅球星加里夫巴利仲話：「呢場係我一生中最開心嘅輸波！呢場波好難踢，但最重要嘅係我哋成功過關。我哋全隊威爾斯都情同手足，我𠵱家簡直係夢想成真；跟住我哋就要好好喺法國有一番作為。」
至於威爾斯領隊高文亦話：「我初時都唔知己隊已出線，不過當見到觀眾席嘅威爾斯球迷唱晒歌，而威爾斯足總秘書又喺我耳邊細聲講『以色列輸咗』，我就知道我哋成功咗！」高文更不忘向已故嘅威爾斯領隊史必致敬：「史必在天之靈一直都喺度保佑我哋。」
成功出線就當然開心啦，不過，巴利其實亦唔係冇煩惱㗎。據報，佢女朋友艾瑪嘅爸爸賴斯鍾斯因為商業詐騙而喺美國被捕，但美國有關方面就係怕賴斯鍾斯會動用巴利嘅財力而棄保潛逃，所以一直唔俾佢保釋呀！