已經辭任立法會議員嘅公民黨前成員、民主思路召集人湯家驊，曾經被港區全國人大代表羅范椒芬點名去選特首，湯大狀噚日接受電台訪問時，坦承真係有諗過做特首㗎，但唔係佢嘅目標。
被視為溫和派嘅湯大狀話呀，自己雖然同中央有交流，但只係比較接受嗰隻，而喺唔符合公義嘅制度下，即使入到閘都出唔到閘，個人絕對唔接受「陪跑」，一定要選到先落場，否則返屋企聽音樂好過。
佢重申當初進入議會係想推動普選，但香港𠵱家同佢越走越遠，自稱喺立法會「無成績可言」，強調既然無法改變中央思維，就只可以喺框架內爭取最好嘅政治成果，又質疑有啲公民黨前戰友，只為求政治成果、着重別人讚自己而忽略執政目標喎。