喺上周四正式成為利物浦領隊嘅高路普呢幾日忙到爆，上周五見完記者後，上周六朝早就同利記足球學校總監恩高科比、U21教練比爾以及A隊發展教練連達斯，齊齊去睇對史篤城U18嘅比賽；新老細親身嚟睇，利記班𡃁仔亦份外落力，結果亦順利以1:0贏咗史篤城U18。咪以為高路普喺周日會休息番一日，佢冇咁做，仲進行加盟利物浦後首課操練，而且要求唔使踢國際賽嘅史杜列治、艾拔圖摩蘭奴、盧卡斯同埋菲臘比古天奴，取消休假返球會一齊練習。
利物浦喺周六就要作客對熱刺，高路普當然不敢怠慢，爭取時間做備戰工作。英國傳媒話，笑言「唔識好似耶穌咁喺水面行但就識潛水」嘅高路普，已鎖定冬天轉會市場嘅收購目標，分別係緬恩斯門將卡利奧斯、利華古遜門將賓特尼奴，同埋喺多蒙特跟過佢嘅拜仁慕尼黑前鋒羅拔利雲度夫斯基。