隔牆有耳：鑽石王老五拍賣　陪遊山玩水 - 李八方

香港首個為單身貴族而設嘅生活品味博覽會「小緣圈博覽」下年情人節舉辦，參加者會喺三日兩夜內，透過唔同活動同工作坊識人，活動由有鑽石媒人之稱嘅吳美玲Mei Ling舉辦，佢預告有個環節叫做「拍賣男人」，鑽石王老五任你叫價，價高者得，陪你遊山玩水，啲錢會捐去慈善團體。

王貽興 亞生報咗名

活動開始接受報名，入場費幾貴，女士要2.5萬，男士要8,800蚊。點解女士貴啲？原來女仔先有化妝同形象設計指導。除咗要錢仲要有學歷，男士起碼要有大學學位，女士最少要有兩年專上教育嘅學歷，同埋只限異性戀。
Mei Ling話門檻高係想確保參加者質素好。如果參加者一年內結埋婚，仲會獲贈蜜月旅行、婚紗攝影、酒席同結婚蛋糕！
據知藝人王貽興、八珍家族後人伍尚鴻同落選亞洲先生涂諾Ronald都報咗名。35歲嘅Ronald話開始俾媽咪逼婚，之前喺娛樂圈識唔少女仔但都冇發展機會，希望可以喺博覽會識個真心想結婚嘅90後。