已經報名參加黃大仙區議會龍星選區、至少會同人民力量成員、但以前綫名義參選嘅女將譚香文嚟一場硬仗嘅大律師林作，除咗同十優狀元港姐麥明詩嘅關係惹人注目，政圈傳聞亦唔少。
陶傑：覺得佢好掂
最近地區消息傳出，曾經力挺「西環契仔」謝偉俊嘅「東九龍居民委員會」，會為阿爺執行「家法」，來屆立法會改為支持林作出選九龍東，取代政改甩轆兼「洩密」嘅謝偉俊。
八方問過林作，佢強調對相關傳聞「完全唔知、冇聽過」，強調「東九龍居民委員會」至今冇人接觸過佢，亦未聞有人想佢取代謝偉俊出選來屆九東立法會。其實唔少政圈中人亦對才子陶傑前日陪林作報名參選有啲意外，到底兩個有乜關係？陶才子解釋，識得一個認識清洪大狀嘅律師，約兩年前介紹咗林作畀佢識，覺得林作好掂，所以支持佢出戰。