食物有時真係可以好邪惡！
之前講過，中環置地廣場一間食店有款「大膽菠蘿牛」，牛角包加菠蘿皮，中間再加塊厚厚牛油，諗起都覺得肥。中環近九記牛腩附近有間雪糕店，有賣雪糕冬甩，不相伯仲。不過老闆話佢哋開業4個月左右，已經有錢賺。甜品真係多人like！
Munchies呢間雪糕冬甩店今年中開業，老闆Michelle大約30歲，佢自細跟家人移民加拿大，約3年前回港發展。雪糕冬甩喺北美、加拿大屬於普遍小食，佢發現香港冇呢類甜品店，於是就搵地方自己開番間。
店內有冬甩師傅製作新鮮冬甩，提供近十款口味嘅冬甩，焦糖、朱古力、綠茶等等任君選擇，顧客可以淨買冬甩，或者配搭不同口味嘅雪糕，眼見服務員認認真真咁將兩球雪糕壓入冬甩中間，呢個價值70元嘅雪糕冬甩都算值回票價。
Michelle承認，呢類甜品店唔會日日都客似雲來，周末與假日最旺，而且比較多外國人幫襯，可能佢哋都掛念家鄉小食，佢都好開心，可以提供香港冇嘅外國甜品。