香港大學的「等埋首副」事件，以鬧劇收場。一位評論員在報章寫文，為12位對陳文敏說不的校董撐腰，指馮敬恩的「洩密」、「爆料」，缺乏證據，例如沒有文件，沒有錄音，傳媒對馮敬恩的單方面言論，沒有核證，因而指馮敬恩言論不可信。洩密需要書面證據或錄音證明？當然有證據更好，但聽回來的消息，也不一定是謊言。不過大罵馮敬恩說謊嘅作家與評論員都唔算係笑話，港大教育學院一位副教授李輝博士先至係。呢位來自內地嘅學者竟然夠膽公開講自己嘅著作「影響因子」（Impact factor）大過陳文敏200倍，即時騰笑杏壇，關焯照博士已在蘋果日報（十月六日）狠批之，呢度唔再講。李輝在學術界究竟係乜水，甚少人知，對本港教育界有乜影響力亦冇人提過，佢教過邊啲成名門生鬼知咩，與陳文敏之桃李滿門不乏城中法律界知名人物，完全不可相提並論，政治真係可怕，一旦政治掛帥博士都會說鬼話。
貨真價實嘅博士級教授練乙錚對學術著作及影響力，知之甚詳，在十月八日信報忍唔住取笑李輝為李200，指佢身為港大博士，港大教育學院副教授，竟如此不堪，令人無話可說。李200呢次發達咯，口出狂言以致聲名大噪，或者港大校委會看在眼裏，覺得此人忠心可用，不日擢升佢為正教授都唔定。港大校委會12票多數，跟足文匯大公嘅言論投票，可話變相係「文大」指揮「港大」，後果如何嚴重，港大校友程翔在1989之前，曾是文匯忠臣，知得比我地更清楚。
李200講個人影響因子，學者笑佢亂來一通。左丁山係凡人，但知道何謂impact，香港大學創校百年有多，對香港發展，當然極有impact，港英殖民政府成立港大，首先重工醫輕人文，港大培養出來嘅醫生工程師，戰前唔識講咯，戰後70年，有那一間醫院，那一條道路、大橋，冇港大醫生工程師之貢獻在內？香港今天之基建及醫療體系，世界稱譽有加，港大生功不可沒。至於法律，四十五年來出咗不少大律師、資深大律師、法官，以至終審法院法官，港大法律學院又係對香港極有impact嘅。比較起來，李輝之流對香港有甚麼impact？根本微不足道，只係一個大笑話！