大家都知道過去曾經兩季頭馬唔達標的練馬師孫達志，未來任何一季成績再肥佬，就會冇牌出局，本來今季佢大有起色，個頭開得好好，首三個賽日分別勝出「威祥」、「路路發」、「晨采」、「麟轉乾坤」4場頭馬，仲一度成為榜首馬房，殊不知係咪限於兵力，原來只係一啖虛火，老孫之後8個賽日狂吞白果，排名急瀉至目前第13位。喂，再咁搞落去，又再艱苦護級，真係諗起都閉翳！
不過老孫又豈會坐以待斃，今個周三(14日)快活谷夜賽，佢就出招展開自救行動，將角逐四班谷草1000米的「幸運戰略」初配雷神莫雷拉，希望好似早前「晨采」咁帶來突破，為隻馬打開在港勝門。
孫達志說：「今次是我主動找莫雷拉策騎『幸運戰略』，此駒上仗排劣檔跑直路賽，都可以拼入殿軍只輸一身位，可見佢由二班80分，減至四班43分後，已有強大反彈力，本來我希望此駒再跑沙田草地1000米直路賽，可是下次四班直路賽，要等到11月8日才有編排，為免牠相隔上仗太耐冇跑生疏，所以才報跑快活谷，『幸運戰略』復課狀態更勇，以其速度轉戰快活谷1000米，理應可以勝任，加上莫雷拉的搶閘功夫，相信有望發揮出最佳水準，贏回一場頭馬。」