一連五日的香港潮州節星期四開鑼，話晒今次係首屆舉行，仲有潮汕小食攤位、文化及藝術表演等，趁開幕日就立即去行個圈。最多人圍住嘅當然係小食攤檔，其中賣滷鵝嘅「汕特日日香鵝肉飯店」就最犀利，人人湧埋去買滷水鵝。不過望望價錢牌會發現，「鵝頸連老鵝頭 $920」、「老鵝身 $1250」。可能你會話，「乜食鵝唔係食左脾咩，點解鵝頸咁貴架？」冇錯，佢的確貴，但貴得有道理，皆因呢隻係獅頭鵝。
廣東有三大名鵝：黑棕鵝、黃棕鵝及獅頭鵝。論肉質，黑棕鵝第一，黃棕鵝第二，獅頭鵝第三。但論體型，獅頭鵝就排第一，因為個頭似獅子而得名。而潮汕有「無鵝不成席」嘅講法，獅頭鵝遠近馳名，更被譽為「世界鵝王」。據架己冷兼醫管局前主席胡定旭話，一般鵝通常身大，鵝頸唔會太長，但獅頭鵝啱啱掉轉，鵝頸好長，身好細，「一隻鵝身要1000蚊，但淨係買條鵝頸都要800蚊，之唔係因為佢成日搖嚟搖去，所以肉質係最嫩，做滷水一流！」而且亦因為呢條「唔硬頸」仲連住一個老鵝頭。老鵝頭肉質軟滑，皮下嘅膠質又豐富，滷完非常入味，又有咬口，難怪叫價會比個鵝身貴。所以話，識食滷水鵝，一定揀鵝頸連頭！
記者︰黃依情
