「MOLA MOLA！」我求大俠係曼城領隊比歷連尼的話，𠵱家真係愁到爆，難得上周靠阿仙奴大勝曼聯，坐返上榜首，點知呢輪國際賽期，阿古路同大衛施華兩大主將一齊受傷，分分鐘連月底場曼市打吡都唔出得，堅大鑊！
月底撼紅魔隨時冇兩件
上周五場歐國外，西班牙大勝盧森堡4:0，鎖定C組首名，提早出線，但唔好彩，有兩個球員因傷退下火線，中場大衛施華開波10分鐘足踝受傷，由桑馬達入替，賽後有報道話佢要唞兩至三星期，最快月尾先出得，呢鋪真係考起比歷連尼嘞！因為日前阿古路幫阿根廷踢世盃外時受傷，又要養傷一個月，更有報道話佢要唞兩個月，計一計，施華都仲可能趕得切今個月25號作客曼聯場聯賽復出，但阿古路就唔太樂觀。曼城中場冇咗施華都仲有奇雲迪布尼派牌，但阿古路基本上無可代替，搵韋菲特邦尼踢中鋒，攻力即刻差一截。
莫拉達斷腳虛驚一場
帥，仲有意甲祖雲達斯教練艾基利，因為艾華路莫拉達喺33分鐘傷出。一度有傳莫拉達斷腳，真係嚇到艾基利個心離一離！後嚟西班牙傳媒透露，只係虛驚一場，莫拉達腓骨同脛骨都冇斷，但至少要唞一個月。祖記今季聯賽成績低迷，保羅普巴又傷緊，如果冇埋莫拉達真係幾傷。喺呢輪國際賽期受傷嘅，仲有德國中場馬里奧葛斯，佢就傷得最重，要缺陣三個月。
另外，之前塞爾維亞贏阿爾巴尼亞場波，塞軍嘅伊雲洛域同尼曼查馬迪竟然一齊傷出，車路士領隊摩連奴就頭痕嘞！不過，有啲車迷就好開心，因為伊雲呢個後防「毒瘤」終於有機會唔使落場。