跑馬有時神奇到你唔信，嗰頭講緊雷神第七場揀錯「飛廉之子」，畀潘頓接手「超凡夢想」勝出剃佢眼眉，呢頭潘頓於第八場二班1400米再整多隻「包裝奔馳」雷神嘆。
事關雷神今場揀騎蔡廐「華恩庭」，結果跑落不但輸畀頭馬姚本輝馬房之「包裝奔馳」，仲要拉士一步畀全場最老之「夢仙」冚過埋，由後駒攞到Ｑ腳，1.7倍全熱門「華恩庭」只得第三，第四名係「醒目名駒」。賽後由林峯做頒獎嘉賓，頒獎給「包裝奔馳」騎練潘頓與姚本輝。
計埋第七場「飛廉之子」1.9倍又係第三在內，雷神單係呢兩場揀騎一對蔡廐新勝馬，已經輸咗馬迷逾2,600萬獨贏投注額。
講番潘頓，呢兩場接手雷神棄騎贏完一隻又一隻，個人包辦第七口孖寶，兼憑「包裝奔馳」勇奪全日戲肉六福珠寶盃，繼9月28日後再次捧盃起孖。
現年五歲之「包裝奔馳」向以後勁強橫聞名，跨季近五場全勝，今場3.8倍WIN已係歷來最冷一次頭馬，出道至今九戰六冠兩亞，呢次贏馬後將肯定加至100分以上，年尾國際賽隨時有份跑。