隸屬呂健威馬房之22歲女見習騎師蔣嘉琦，今個馬季起開始在港出賽，一直只跑沙田賽事，限於經驗而暫時唔能夠跑彎道較急的快活谷賽事。今日係嘉琦BB個人第七個賽日在港上陣，頭三場她都冇座騎，到第四場四班泥地1200米，嘉琦BB一上陣，即憑徐雨石馬房4.9倍之「頌友」後上影相險勝放頭馬「大把籌碼」短馬頭位，職業生涯首次在自己成長地香港贏馬。
洋名阿Kei之蔣嘉琦賽後笑得特別燦爛，不少同袍、練馬師及馬主都向佢送上祝賀，師傅呂健威亦好戥呢位女徒兒高興。馬會前主席陳祖澤的團體馬「大把籌碼」雖然搏失得亞軍，但他仍十分大方，上前恭賀嘉琦，一起合照。
蔣嘉琦係近15年內首位在港出賽之本土女騎師，對上一人係余詠詩，而最近一場女騎師頭馬，已係2000年5月13日在沙田馬場草地1200米，由余詠詩勝出的「飛魚王」。
今場騎「大把籌碼」跑第二之黃皓楠亦是見習騎師，早蔣嘉琦一季在港出道，但比嘉琦年輕一歲，一對小將包辦連贏，堪稱佳話，而訓練「頌友」之徐雨石，正正就係黃皓楠師傅，亦可算巧合。今場嘉琦直路策「頌友」鬥後勁其實騎得不算狠，但「大把籌碼」漸力歇，造就嘉琦BB開齋。
至於今場三、四名，分別由霍勵賢及田泰安策「高山威龍」及「現代財星」取得。