自由行最近據講少咗，搞到香港啲零售業生意差晒，但作為自稱係動感之都，最叻變通嘅香港人已揾到另一個新方向，就係用運動吸引世界目光。
其實香港處處都係運動好去處，明年中環有賽車睇，渣馬又改路沿彌敦道落旺角，遊客們可以一邊跑、一邊睇吓嗰「MK look」，不過對特別鍾情尖嘴嘅國內朋友嚟講，最正都係呢個禮拜可以去尖沙嘴踩單車，大家有機會體驗一吓電影《甜蜜蜜》入面，黎明響廣東道踩單車嘅浪漫，車尾有個張曼玉咁款攬吓就最好喇，不過據講香港單車載人係犯法，大家執生嘞。
諗落keep住響尖沙嘴有單車踩係吸引到遊客嘅，尤其是人人有部自行車嘅國內朋友就肯定有親切感，攰起上嚟踩車好過踎吖，另外架車一定要有車頭籃，方便同胞踩住去名店購物，長遠嚟講租車地點可以喺天星碼頭，直頭食返絕種嘅人力車個位就啱晒。
踩完單車望住維港對岸，遊客可能有兩大好奇，第一就係邊度上賭船，第二就係其實游唔游到去對面海嘅呢？係呀，𠵱家個海越填越近，真係令到大家有種模仿摩西嘅衝動，好想征服吓呢個海港㗎，咁家陣渡海泳（圖）都已經復辦好幾屆啦，睇嚟係時候比街坊玩之外，開放埋比「游客」一齊玩啦，又可以彌補返呢幾年無咗星光大道嘅失落！安全問題當然要考慮，唔識游水無緊要，可以買水泡同租艇仔，但最緊要係有夜場喎，因為每逢八點嘅幻彩詠香江呢，好多國內朋友都話冇料到，跳落海載浮載沉睇的話可能會夢幻啲。
世界上恐怕都無第二個泳灘個景靚得過香港呢個嘞掛，水上面最緊要整返幾十個影相站比大家selfie喎！你話若果遊客們去完香港之後都帶返張「香港一游」嘅相返鄉下，大家仲唔重新愛上香港咩？好客之道，又點少得你吖！
KEYMAN
節目主持
電郵：mailto:[email protected]