潘頓第七、八場贏「超凡夢想」、「包裝奔馳」起孖後，到了第九場三班草地1200米，佢騎次熱門沈廐「永旺年年」一檔起步全力出擊，諗住中三元，沿途跑落亦冇犯錯，可惜潘頓的澳洲鄉里柏寶唔畀面，柏寶騎住2.6倍大熱門，呂健威馬房新勝馬「幸運如意」，負131重磅下，全程啄實「永旺年年」嚟跑，「幸運如意」直路望空一衝，順勢突圍而出，一鞭不打，以逾兩身位之先輕輕鬆鬆取得連捷，馬主吉祥團體成員溫佩珊女士，賽後顯得好開心。
反觀「永旺年年」輸開有條路，季內兩戰配潘頓全第二，四歲馬未能重開勝門。上次日賽雷神同潘頓缺陣，柏寶贏「喜利高」同「碧科」起孖，今日跑完頭八場，雷神、潘頓兩人共取五Win，柏寶亦唔執輸，憑第九場「幸運如意」拎番一Win。
今場「永旺年年」屈居亞軍，與「幸運如意」構成3.9倍大熱Q，第三名係東廐新勝馬「幸運日」，29倍冷門「快無極」跑第四，四重彩因此有近千八蚊派。