午飯之時，大家講起曾蔭權涉嫌不申報利益案，講到黃楚標，又講到DBC，及鳳凰衛視主動放棄數碼廣播牌照，交還俾政府。發展數碼廣播原是政府政策，但人走了就茶涼了，現時已無人飲茶，攞咗牌嘅無不呻笨，被害得最慘嘅（從金錢角度嚟）當然就係黃楚標買下嘅數碼廣播電台。
講講吓，律師出身嘅投資A突然問：「點解會有人肯買亞視呢？」呢個問題冇人識答。內地媒體公司明知亞視已經被特區政府收回電視廣播牌照，仍然入股，究竟為乜，投資着眼於乜，我哋受香港或金融訓練嘅人，諗爆頭都不懂其中商業邏輯。投資T初出道，做大律師樓律師仔之時，參加過幾宗大型公司破產／債務重組案件，老早就知道做「公司醫生」需要極大膽識及堅穩現金流作後盾，先至有希望成功，貿貿然咁去買一間廣告缺乏、現金不足、出糧有阻滯嘅公司，實在匪夷所思。
都係有經驗曾駐守北京做辦事處代表嘅退休博士C有智慧，佢話：「內地人講投資併購，注重投資對象（例如亞視）嘅影響力及知名度，佢哋諗住會利用知名度或品牌嚟吸引更多生意或更多新進投資者加入，總之有名氣就有辦法，人哋睇長線釣大魚，一鋪發大財喎，點似得我哋香港人咁小家，吓吓睇現金流、內部回報率、股東利益諸如此類呀！」
好，我哋自認敝鄉啦，唔識得玩中國更大傻瓜（bigger fool）遊戲。中國投資者在海外買貨，勇猛過李超人好多，譬如海通買葡萄牙銀行、復星買Club Med、安邦保險買紐約華度夫酒店、SoHo張茵買紐約Chase Manhattan Plaza、王健林買西班牙馬體會（足球隊）股權等等，都係望買入嘅資產將來升值增長嘅，有得搏，冇頻撲，至於是否合符現時股東最大利益，要佢哋嘅股東先至知道。性好潛水嘅財務W以前去過幾次Club Med，依家就驚住以後Club M會大舉招徠強國遊客，破壞寧靜。唉，唔驚得咁多嘅咯，左丁山20幾年前去過峇里島Club Med，每日三餐自助餐，真係去一次就夠晒數，有仔女嘅30幾歲中產夫婦，去一次無妨，兩公婆二人世界嘅話，去馬爾代夫仲好。奧巴馬今次去聯合國大會，放棄美國總統傳統唔住華度夫，以後美國大亨、政要是否有樣學樣？中國土豪愛國，以後去紐約，可能指定入住呢間，慢慢就會趕走陶傑型高品味嘅熟客。