大家飲咗東江水咁多年，污唔污糟，心照唔使多講。立法會發展事務委員會終決定去外地考察海水化淡技術，可能去新加坡，又可能係以色列，總之市民朝脫離東江水行近咗一步。人民力量陳偉業噚日話，香港人被迫飲咗「屎水」同「鉛水」咁多年，東江水裏面有唔同嘅化學品，唔排除含鉛食水部份來源係嚟自東江水，希望透過海水化淡可以改善吓。但呢句冇乜特別嘅真話，就俾剛成為財委會副主席嘅陳鑑林話係污衊同歪曲事實，佢話唔應該將東江水形容成「屎水」喎，仲話中央多年嚟確保香港食水供應正常同水質乾淨。原來係咁，真係感謝黨。