大家有冇印象，本報講過全港最巨胸女騎馬人Xaviere，上季尾曾穿低胸藍色長裙入場，呢位法籍美女本周六(10日)將再次入場等睇好戲，在亮相圈力撐佢自己打理的「電子鳳凰」，角逐第三場四班1600米，希望隻馬如鳳凰般展翅高飛，做齣好戲開齋。
出名臭脾氣的「電子鳳凰」上季經常在閘廂搞搞震，但上月底試1200米泥閘大有進步，在閘內表現乖巧，起步順利，留前鬥後，鞍上人田泰安在最後直路稍稍推騎，馬兒立即加速大步湧上，輕鬆追入第二名，走勢十分悅目。
針對「電子鳳凰」的情緒問題，田泰安和Ｘ小姐付出大量心血和時間教馬，隨馬兒逐漸成熟，脾氣大有改善，田泰安話對今仗非常期待，他說：「『電子鳳凰』有長力，今仗季內初出跑1600米唔會有問題，遲啲增程爭1800、2000米威力可能仲勁。我要感謝Xaviere，屆時佢喺亮相圈打氣幫助會好大，因為『電子鳳凰』同Xaviere係親切的好朋友，隻馬見到Xaviere情緒會更加淡定，唔會好似以前咁易驚青。」
八十後索女Ｘ小姐是泰拳和柔道高手，策騎經驗亦豐富，曾喺法國做見習騎師，掛靴後先後在當地、英國新市場和杜拜等地擔任騎馬人，約一年前來港工作，這日(9日)Ｘ小姐親自為「電子鳳凰」作最後備戰踱步，不時輕拍馬頸，在她的心目中「電子鳳凰」仍是BB，需要付出愛心、關懷和鼓勵，才能建立自信心。