曾蔭權被老廉告，社民連功不可沒，事關佢哋有份去廉署舉報煲呔曾。不過社民連前主席陶君行日前喺網台爆料，話幾年前煲呔卸任前被揭涉貪，當時人稱「煲呔針」嘅鄭經翰（圖）主動打電話畀佢，同佢講有個好主意，就係去舉報時任雄濤廣播主要股東黃楚標租樓畀煲呔曾。
阿陶仲話，事後佢都覺得奇怪，黃楚標係大班嘅拍檔，煲呔曾又係大班朋友，點解要叫佢同長毛舉報呢？後來阿陶覺得或者同DBC糾紛有關。
大班助手同八方講，大班唔喺香港，而據DBC引述大班透過助手反駁，指阿陶講法與事實不符，會保留法律追究權利，仲鬧阿陶「忘恩負義」、「含血噴人」，認為阿陶之所以咁講，係因為大班唔再支持阿陶及其有關嘅政團參選。