立法會議員黃毓民（圖）即使年屆63歲都仲中氣十足好好火，每次出巡都有一班熱血護法喺左近。毓民噚日就舊年行政長官答問大會期間，涉嫌用玻璃杯掟向梁振英嗰單襲擊案，到東區法院應訊。
嚟到法庭，毓民都盡顯個人風格，大大聲、義正辭嚴投訴控方未交齊文件畀佢，好唔公平咁話。原來控方早有54份聲稱唔會用嘅證據文件，但毓民只收到其中12份，咁又唔怪得教主嬲嬲豬嘅！
毓民仲提到，已親自去信邀請立法會議員同高官做佢辯方證人，但到現時為止都冇人理佢。佢話會再向所有議員同高官發信，不論對方係藍色定黃色、定還是睇唔睇到佢襲擊。嗱建制派、高官機會就微㗎喇，但當時27位泛民當中，有23位曾譴責毓民掟杯喎，咁人哋又會唔會應承幫佢做證呢？6個星期後嘅預審就會揭盅！