【拆局】
特首梁振英被揭發多次約晤港大校長馬斐森，令一直盛傳梁插手要港大校委否決陳文敏做副校長，再添新證據。有屬港大校友的政界人士透露，不少有份量港大校友曾向北京進言，認為否決陳任命後到此為止，不要再按梁想法，由李國章接任校委會主席，以免挑動更大社會抗爭；但也有人認為，以梁好鬥性格，加上李有恩於梁，恐難扭轉大局。
校友曾向京進言「收手」
該政界人士指，梁多次約晤馬斐森，一定是討論否決陳文敏做副校長問題，甚至不排除是施壓，「特首單獨約一個校長見面，可謂絕無僅有，以往特首一係唔約，一約就約八大校長一齊見，咁安排梗係傾陳文敏，唔通風花雪月咩！」再加上早前馬斐森對外媒稱，相信否決陳文敏任命有中央干預，梁秘密約見馬可作佐證，「咁就唔難估計，馬斐森覺得有中央干預感覺，極可能係來自同梁振英嘅會面」。
外界一直認為，按梁的「劇本」，下一步就是年底由李國章接任校委會主席，再待適當時機撤換馬斐森「老外」校長，該政界人士說：「到時要再整戴耀廷又好、港大學生會又好，就容易好多」，但他知道不少港大校友曾向北京進言，希望對港大的干預到此為止，「有一班德高望重老校友，對今次事件好反感，亦對李國章好不滿，佢哋有渠道向北京反映意見，希望否決陳文敏之後，北京可以收手，唔好畀李國章做校委會主席」。
可是梁看來不會就此收手，因李國章是他參選時悍將，曾為梁做證，否認梁在行會內說過出防暴隊言論，「李國章係有恩於佢，再加上張震遠出事後，李國章算係佢身邊最似樣人物，如果今次俾人砌冧李國章，佢就冇人可用，甚至影響連任大計」，所以他料梁未必肯罷休，必定堅持任命李國章。
■記者莫劍弦