仲有三日，NBA中國賽就會首度喺深圳開戰，有份來華嘅快艇後衞基斯保羅（Chris Paul、CP3）禮拜三拉大隊，喺洛杉磯出發準備呢場季前熱身賽；而對手黃蜂同日亦啟程飛去深圳，新加盟嘅林書豪（Jeremy Lin）仲同一班隊友喺機上自拍，睇嚟融入球隊冇難度啦！
中國賽波飛搶購一空
NBA中國賽嚟緊禮拜日起，一連兩站先後喺深圳同上海舉行。賽事嚟到第11年，今年先至第一次落戶深圳，除咗當地球迷為之瘋狂，一河之隔嘅港人北上睇波都算就腳，所以門票都極之搶手，350至1,200蚊嘅門票已經搶購一空。雖然係季前熱身賽，但兩支球隊快艇同黃蜂一樣咁認真，禮拜三已經分別啟程出發去深圳備戰。
講起快艇，點少得CP3同比歷克格芬（Blake Griffin）？其實呢兩位球隊主將前年齊齊嚟過香港，之後都有北上為贊助商做宣傳；不過，今次為比賽而嚟，CP3喺個人twitter晒完同隊友喺飛機上嘅合照，出發前講起中國之行，態度都明顯認真得多：「我好幸運已經嚟過幾次，今次大家都知道係為比賽而來，主要目標都係想藉此加深大家對球隊嘅了解。」
黃蜂帶埋啦啦隊訪華
至於黃蜂同樣喺周三出發，相比快艇，部份成員可能較少去中國，除咗啦啦隊靚女上機前自拍，成班球員鬼咁興奮，等上機嗰陣拎埋遊戲機出嚟，瞓地下都要打番餐，十足學生去旅行咁；之後全隊上咗機，又拎埋自拍神棍出嚟影大合照，當中就梗係有今季新加盟嘅球星林書豪啦。
主力控衞K獲加（Kemba Walker）就透過球隊網誌爆料，話甩骱受傷嘅前鋒基徹斯特（Michael Kidd-Gilchrist）雖然去唔到，但都特登晨早去機場送行，搞到佢同一班隊友不知幾感動。但講到此行目標，佢就好似唔記得咗係嚟比賽：「我自己從未去過中國，所以到埗之後，我最想可以出外睇吓呢個國家。」
兩隊禮拜六會出席歡迎晚宴，比完賽下個禮拜二就會轉去上海。
