首屆「積金好僱主」嘉許禮噚日舉行，653間機構獲嘉許，包括青洲英坭公司，執董曾百中話為鼓勵員工參與自願性供款，公司會作配對，提供額外供款上限5%，又話有叫3間MPF公司減吓收費，聲言社會如果有共識，唔介意分階段取消對沖，寧「死慳死抵」。
同獲嘉許嘅仲有協德網絡，公司不設僱主供款上限，如員工月薪5萬元，僱主都會供款5%即2,500元，多過法例上限1,500元，額外1,000元當作僱主自願性供款。
勞福局局長張建宗致辭時話人心肉造，僱主對僱員好，僱員肯定會賣命，「唔會同你斤斤計較，唔會同你講標準工時」。八方聽見局長咁講一額汗，勞權同計較係兩回事，如果以佢嘅標準，莫講標時，退保同醫院等福利都唔使要，打工同做奴隸冇乜分別。