噚日「實發」咁好日子，亦係瑞銀輪證團隊成立10周年，佢哋喺中環四季酒店豪搞酒會慶祝，請來大台兩位靚女主持黃心穎與張秀文撐場，負責上台玩遊戲，壓軸仲有歌手韋綺姍跟蔣志光合唱《相逢何必曾相識》等幾首歌，現場氣氛相當高漲。
瑞銀已經連續第7年舉行周年酒會，今年慶祝十周年，規模較大，有過百名財經界人士捧場，包括唔少股評人。瑞銀董事總經理于正人作為主人家，心情大好，上台又唱又跳，但同靚女合照時就即刻正經晒！
除咗有嘉賓唱歌，現場亦有好多特色攤位，畀嘉賓有得食亦有得玩，包括有魔術表演、按摩、占卜、甚至筲箕灣東大街嘅雞蛋仔檔都搬咗嚟。
最特別應該係腳踢「桌球」，中國銀盛嘅郭家耀、獨立股評人潘鐵珊等一班股評人都有落場踢兩腳，郭家耀踢得幾似樣。
