尖沙嘴誠品生活已試業一星期，今日正式開幕。
董事長吳清友（圖）同擔任副董事長嘅女兒吳旻潔特登來港，吳董講起一直都好鍾意香港，1972年第一次嚟，就喺尖沙嘴買咗人生第一本英文書，講建築嘅。又話第一次睇《歌聲魅影》都喺香港，早排仲喺QE做咗個大手術。
吳董話，從來唔覺香港係文化沙漠，銅鑼灣店開咗三年，賣出超過200萬本書，好希望誠品將來在港落地生根。
對於有評論話誠品百貨化，吳董非常介懷，強調從來最重視閱讀，「全世界的書店經營都困難，要突破困境，就要創新…誠品不會墮落的！」佢話自己由小店做起，經多年努力先建立到品牌，所以好希望將經驗，向有熱誠但冇經驗嘅小店分享，幫佢哋做好營銷、包裝等。