香港大學應屆學生會會長以校委身份，洩露校委會討論陳文敏事件時的若干內情，譬如有校委指陳文敏沒有博士學位，有校委指陳的學術地位不夠，有校委指陳文敏率先自爆是副校長候選人，甚至陳文敏沒有問候一位校委跌倒後的身體狀況等等，於是乎，香港人把本來應該是嚴肅理性討論的最高學府校務委員會會議，視為鬧劇Reality Show，很傷害港大的校譽。
後來有校委指責馮敬恩是大話精，沒誠信（integrity），究竟是指馮敬恩簽了保密協議然後反口呢？還是馮敬恩公開講述的校委反對陳文敏的理由是一片謊言？若是前者，馮敬恩冇否認，即是簽了保密協議唔算數，佢嘅個人榮譽感大有問題，但正所謂食得鹹魚抵得渴，以後佢畢業後去搵工，冇大公司大集團請佢，冇政府機關請佢，甚至乎去搵份教書職位都有校長怕咗佢，馮敬恩早應該心中有數，要做爆料英雄，係會付出好大代價嘅，閒雜人等鬧都無謂。
就係因為咁，將前途押注落去，馮敬恩似有「捨得一身剮，敢把皇帝拉下馬」嘅心態，放手一搏，我地大人大姐，有乜好意思鬧佢大話精背信棄義吖。若果一啲校委如盧寵茂醫生教授（冇博士學位），陳坤耀教授（有博士學位，有正室，有外遇）肯企出嚟，清楚覆述在校委會會議上之發言，以證明馮敬恩亂噏講大話，咁又唔同講法，但到依家為止，好似冇一位反對陳文敏嘅校委敢大大聲話馮敬恩講錯晒噃！
與一位港大校友律師講及違反保密協議之事，佢話自從美國出咗一個史諾登之後，世人對爆料之事有唔同睇法，爆料者未必一定俾人鬧，故此反陳文敏派在馮敬恩洩秘一事上大做文章，恐怕唔會產生甚麼效果，至於馮敬恩話可能申請司法覆核，呢位港大校友律師就認為嘥時間，佢老早與幾位港大律師研究過，司法覆核勝算甚低，無謂去搞，馮同學唔信可以問吓陳文敏。呢件事搞到不少港大校友面左左，亦搞到同姓堂兄弟意見不合，李國章擺明唔妥陳文敏做港大副校長，但原來佢嘅堂弟李國能大法官曾為陳文敏寫推薦信！講外科手術就話信李國章啫，講認識法律學者成就，怕要尊重李國能呀嘛！（作者按：二次大戰女記者Clare Hollingworth於10月10日慶祝104歲生日，今晚10月9日5點半至7點，友好為她在香港外國記者會FCC舉行酒會，歡迎認識Clare的友好到場，祝賀這位世上唯一曾訪問戴高樂的傳奇記者。）