黃蜂駕臨深圳，機艙大合照唯獨少咗班主米高佐敦（Michael Jordan）。「波神」早前已經公佈，會去上海出席「Air Jordan」30周年活動，咁啱今日「一剔牌」又會喺香港舉辦青少年活動，唔知呢位籃球之神會唔會做埋神秘嘉賓，順道訪港一解球迷相思之苦呢？
「一剔」咁啱香港有活動
米高佐敦對上一次公開訪港，已經要數到2004年，去咗會展幫贊助商做比賽評判。NBA中國賽喺2004年首次舉行，咁啱黃蜂喺11年後又去深圳比賽，又咁啱MJ自己應承咗呢段時間會去上海，出席「AJ」30周年活動，唔通真係有機會順道嚟埋香港？「一剔牌」噚日真係發咗新聞稿，但就唔係公佈MJ訪港，而係邀請傳媒出席「Jordan Wings」社區青少年支持計劃。
新聞稿內容極之神秘，時間、地點一律保密，只係請傳媒中午喺天后集合搭專車，亦唔肯透露Jordan Brand主角MJ會唔會在場。各位球迷如果想求證，就要留意今日嘅即時新聞或者《體蘋果》 http://fb.com/appledailysports 嘅報道，又或者睇吓有冇咁好彩喺街度撞到偶像喇！