喺上個月宣佈同陳偉霆結束5年情嘅阿Sa（蔡卓妍），一直以工作平復心情。噚日佢同阿嬌（鍾欣潼）合體喺W酒店出席「Twins LOL演唱會」嘅記者會，兼且仲宣佈加開年1月3日，合共4場。
喺記者會入面播咗一條以狙擊手造型拍攝嘅短片，吳雨大哥仲送咗兩支槍畀佢哋，寓意門票秒殺，但係阿Sa話：「我希望可以再加場，可以破咗之前5場個紀錄，我𠵱家周身飛債，好多朋友想加訂飛！」阿Sa仲自爆攞埋阿爸嘅飛畀內地歌迷，佢話：「我知好多人一早訂晒機票同酒店，如果冇飛會好慘。」
讚舞蹈員有活力
講到今次除夕倒數騷，佢哋話希望大家開心，舞台設計特別，有主題，雖然製作單位大致同以前一樣，但係啲舞蹈員已經變晒90後新人，阿嬌話：「從未同佢哋夾過，佢哋好有活力，令到我哋啲活力都返嚟。」
至於大家好期待嘅側手翻，佢哋話應該會有，不過搞笑咁話：「我哋想搵大哥（吳雨）同Mani一齊打側手翻。」
撰文：馮仁昭