香港有百幾萬人係架己冷，包括唔少政商界中人。「香港潮州節」噚日喺中環遮打花園開幕，政務司司長林鄭月娥（圖）出席主禮，致辭時不忘向潮人笠高帽，話「潮界」人才輩出，連特區最高民望嘅食物及衞生局局長高永文都係潮州人。
被點名嘅民望高，當然都係活動主禮嘉賓之一，典禮開始前已經四圍「搵食」，並向八方力推蝦米笋粿同春餅，話食過一定讚不絕口；同場教育局局長吳克儉，佢媽媽亦係潮州人，笑稱係半個架己冷，吳得掂推介嘅潮食係比較大路嘅潮州粥同魚蛋粉，佢話潮州粥易吸收，食完體力恢復快。
林鄭主禮完後亦即場試食民望高介紹過嘅蝦米笋粿，當然唔少得嘆吓功夫茶。潮州節即日起至12日喺遮打舉行。