昨日中港兩地撞正有三場喜宴，上海有黃曉明迎娶Angelababy，香港則有陳宛蔚嫁監製錢國偉（Wilson）及盛品儒和老婆蔡一鳳補擺喜酒，兩對新人依習俗大玩接新娘，Wilson最烏龍，記錯房號，差點撲空接不到新娘，而盛品儒則最豪氣，他自爆豪花百萬開門利是，還chok上身玩女裝cosplay。
現年53歲的監製錢國偉（Wilson）昨日迎娶細他二十年的「雜果賓治」陳宛蔚（Calinda），於尖沙嘴洲際酒店擺酒筵開逾五十圍，婚宴以金色為主調，充滿奢華氣派。早上Wilson身穿啡金色西裝，率領一班「古惑佬」兄弟團鄭伊健、謝天華、錢嘉樂等浩浩蕩蕩現身酒店門外準備接新娘，門口停泊一部藍色古董勞斯萊斯做主花車，另外有三部法拉利，其中一架車牌是「AN9999」，寓意長長久久！一對新人依足傳統斟茶給Calinda的父母，Calinda兩位妹妹也做姊妹陪姐姐出嫁，二妹陳宛莛更在fb透露自己有喜，可謂雙喜臨門。
去錯房接新娘
下午4時半，一對新人在酒店大堂接受訪問，新娘子Calinda穿上自己與本地設計師Kev Yiu共同設計的魚尾裙婚紗，佩戴父母及Wilson送贈的首飾明艷登場。Calinda自言婚禮籌備足足一年，問有甚麼感動場面？她說：「佢講嘢（愛的宣言）有啲感動想喊，點知班兄弟噓佢，所以收番眼淚。」問Wilson對老婆有甚麼承諾？Calinda搶答：「佢所有嘢都係我，佢淨係要我一個，所以過咗今晚之後，銀行戶口屋契全部都歸我所有。」Wilson苦笑謂：「係呀，所以聽日都要開工搵錢，成日去旅行唔使蜜月。」問到造人計劃？兩公婆齊聲謂：「冇呀，所有嘢隨遇而安。」
Wilson自爆接新娘時的蝦碌事：「因為接新娘同噚晚住嗰間房唔同，我記錯咗，上到去拍咗好耐門都冇人應，兄弟仲講笑話應該係空城計，仲鬥耐性。但拍咗好耐，伊健話唔對路，問係咪去錯房，天明打畀家蔚話唔好玩嘢，快啲開門，家蔚話門口冇人，先知去錯房。」兄弟團的伊健和錢嘉樂輪流寸爆Wilson：「佢平時做大騷指手劃腳好醒，今日隻眼冇focus，娶老婆好大壓力。」
向小方Stephy逼婚
晚宴上，方力申和洪天明打頭陣表演跳舞，Wilson表示最擔心與曾志偉一齊被隊冧。問到花球拋畀邊個？Calinda希望畀做伴娘的三妹，Wilson則希望畀鄧麗欣（Stephy），順勢在台上逼婚，但方力申笑言拒絕搶風頭。
採訪：譚倩宜、張俊銘
攝影：仇志德、陳志嵐