前財爺梁錦松（圖）近期瞓身宣傳由佢擔任主席嘅惜食堂，噚日佢請傳媒朋友食飯，飯盒都係惜食堂炮製，佢都瞬間扒清光。據聞惜食堂唔少廚師來自名酒店，難怪水準一流。
惜食堂會將回收到嘅剩餘食物，經中央廚房製成熱飯餐同食物包免費派畀有需要嘅人。兩間廚房位於柴灣同深水埗，每日生產6,000份餐。深水埗惜食堂仲有間社區中心，阿松自爆有時都會去打躉，仲會帶埋3子女出動探訪，話咁樣先令子女真切感受到基層市民嘅需要。
宣傳為撲水
阿松瞓身宣傳，無非因為惜食堂「缺水」，需要大家「科水」。阿松喺商界咁多朋友，拍膊頭揼心口理應唔難㗎，佢講笑咁話，可能因此令啲朋友變敵人喎，最希望大機構同普羅市民慷慨解囊，捐款詳情可參閱網站： http://www.foodangel.org.hk 。
其實阿松近期仲同一班教育界人士，研究改革教育制度。舉動多多唔怕俾人話想選特首咩？佢話唔擔心，仲話「唔一定要做呢個位（特首），嗰個唔一定係好位」，強調自己係被誤會想選特首喎。