睇淡樓市嘅紀惠集團行政總裁湯文亮，新近撰寫一篇題為「今年沒有上車的人是贏家」嘅文章，繼續睇淡細價樓，認為供應增加，今年內高價入市買二手樓嘅市民，差不多肯定係輸家。
咁點樣可以成為贏家？湯文亮教路話「贏家唔係叫你即時入市，新樓供應咁多，𠵱家個市開始跌，業主減價，可以慢慢揀。」佢認為，起碼要一年多後先至好入市。至於今年買咗樓嘅人點算？佢就話「都冇辦法，最緊要供得起」。
湯文亮今年連番高調唱淡細價樓，1978年就創辦中原集團嘅施永青就好謙虛咁話：「我喺行內雖然有啲經驗，但對樓價升跌，都冇十足把握」，似係暗寸湯文亮估得太盡。
施永青認為，以投資心態入市嘅話，今年係收穫期，唔係播種期。用家就各有需要，「同女朋友結婚都可能要買樓，好難因為樓價上落而唔入市」。
施老闆指，目前樓市狀態未去到話轉勢向下，跌市未成趨勢，家陣資金始終冇乜出路，最終都會流去買樓，因為買其他產品，例如黃金、股票，都容易損手爛腳。