長建（1038）併電能（006）的交易，儘管集團早前大開輿論機器，不斷對外吹風稱唔會加價，但仍難抵檔電能股東一片反對之聲，長建終面對現實，宣佈加價。不過，長建並未有如市場預期般，大幅提高對電能的換股比例，反而選擇增加特別息，由原本每股派5元，增至每股派7.5元；至於換股比例就只由1.04，略調升至1.066。
市場口痕友說，長建選擇透過增派息來吸引電能股東支持交易，屬「走精面」之舉，畢竟電能街貨既多且散（少數股東佔61%，而至今只有一個基金持貨多於5%），交易能否通過，散戶影響力頗大，故以「現兜兜」派畀你的現金作利誘，效果可能更好。另外，如透過提高換股比例來加價的話，長和（001）所持的長建權益就會被攤薄；相反增派特別息，長和則仍可多收股息，一家便宜兩家着。
按長建未加價前的建議，如電能小股東贊成合併，則每股電能可收取5.2元cash。但電能向來派息豐厚穩定，就算小股東反對交易，今年估計亦可穩袋每股約2.7元股息。所以股東如覺得畀人陰乾「條氣唔順」，大可威脅vote down交易，所付出的機會成本其實唔大，揸返電能，收多一年股息都返晒黎。惟如今長建加價，電能小股東如贊成合併，即可每股袋8蚊，相當於電能近3年股息。呢個價仲值唔值得同佢鬥長命？可能有人會諗一諗。
講到尾，就算長建加價，整個package較電能公佈交易前的溢價，亦只不過得15%（未加價前是9%），以私有化一間上市公司而言，絕對唔係一個慷慨的offer（過去5宗香港上市公司私有化交易的溢價，平均達22%至41%）。電能坐擁的680億元現金，大部份仍是透過派息分咗畀終極控股股東長和，這大前提始終沒變。李澤鉅今次可能沒攞走晒枱面上所有金幣，仲留返個銀畀你刮沙，但他仍然是「贏得好盡」。
海迪