上年甩完底冇玩香港網球公開賽，受腦震盪困擾嘅加拿大美少女寶查又放飛機，噚日宣佈棄戰香港站，傷透宅男心。
寶查上個月出戰美國公開賽，點知喺更衣室跣親，之後一直受腦震盪困擾，先後退出美網、東京公開賽同埋武漢網賽。佢禮拜一出戰北京舉行嘅中國公開賽，首圈都未打完又話頭暈要退賽。不過，北京球迷已經算好彩，總算可以見女神一面；香港球迷等足兩屆，點知噚日佢又透過工作團隊嘅twitter，宣佈唔會參加禮拜六展開嘅香港公開賽。
計埋衞冕嘅德國靚女列絲姬，寶查已經係今屆第二個退賽球手。大會噚晚證實消息，仲宣佈白俄羅斯嘅艾沙倫嘉都因腳傷退賽，但就透露搵咗現時世界排名24嘅塞爾維亞前一姐積歌域頂上，呢位30歲老將喺中網首圈出局後，噚日已經嚟到香港。而大威噚日喺中網次圈出局後，今日都會到港備戰。香港公開賽外圍賽禮拜六喺維園開打，主賽圈就會喺下周二展開。
另外，周三喺北京上演嘅中國公開賽，男單二號種籽貝迪治同埋女單八號種籽禾絲妮雅琪都爆冷出局。